Hər bir xalqın tarixində azad və müstəqil yaşamaq üçün dönüm nöqtəsi hesab olunan tarixlər və bu azadlıq, müstəqillik uğrunda öz şirin canlarından keçmiş qəhrəman övladları olmuşdur. Məhz belə qəhrəmanlar zamanın axarında əsla unudulmur və tarixin yaddaşına azadlıq uğrunda axıtdıqları müqəddəs qanları ilə adlarını yazdırmış 20 yanvar şəhidləri də məhz xalqımızın yaddaşında daima belə yaşayacaqdır. Onların xatirələri həmişə ehtiramla yad olunmalıdır.
Bu ənənəyə sadiq qalaraq bu il də Türkiyənin “İstanbul Beynəlxalq Qardaşlıq və Yardımlaşma Dərnəyi” nin Azərbaycandakı Nümayəndəliyi və Azərbaycan Respublikası Gəncliyə Yardım Fondu 20 yanvar şəhid ailələrini bir araya toplayaraq onlara azadlığımız uğrunda verdikləri itkidən ötrü başsağlığı, səbr, mətanət və vüqarlı olmağı diləyəcək. Tədbirdə hökümət, QHT və KİV nümayəndələri də iştirak edəcəklər.
Görüşün sonunda əvvəlcədən “20 Yanvar Fondu” tərəfindən Türkiyənin “İstanbul Beynəlxalq Qardaşlıq və Yardımlaşma Dərnəyi” nin Azərbaycandakı Nümayəndəliyinə və Azərbaycan Respublikası Gəncliyə Yardım Fonduna təqdim olunmuş siyahılara əsasən 180 şəhid və əlil ailəsinə ailəsinə ərzaq-qida yardımı paylanacaqdır.
Bununla bərabər Azərbaycan Respublikası Gəncliyə Yardım Fondu, Bakı Şəhər Gənclər və İdman Baş İdarəsi Birliyi ilə birgə 17 yanvar 2014-cü il tarixdə saat 12:00-da Gəncliyə Yardım Fondunun konfrans zalında 20 yanvar faciəsinin XXIV ildönümünə həsr olunmuş “20 yanvar faciəsi xalqımızın qəhrəmanlıq səlnaməsidir” mövzusunda tədbir keçirəcəkdir.
Tədbirdə 20 yanvar faciəsini əks etdirən rəsm sərgisi, 20 yanvar faciəsini dünya ictimaiyyətinə tanıtmaq üçün beynəlxalq təşkilatların e-mail ünvanlarına həmin faciəni əks etdirən tam məlumatların yollanması, 20 yanvar faciəsini əks etdirən videoçarxın göstərilməsi və həmçinin orta ümumtəhsil məktəblərinin yuxarı sinif şagirdləri arasında “20 yanvar faciəsi xalqımızın qəhrəmanlıq səlnaməsidir” mövzusunda keçirilən inşa yazı müsabiqəsinin qaliblərinin mükafatlandırılması, dövlət və qeyri hökumət təşkilatlarının nümayəndələrinin çıxışı olacaqdır.
“20 yanvar faciəsi xalqımızın qəhrəmanlıq səlnaməsidir” mövzusunda keçirilən inşa yazı müsabiqəsində I, II və III yerləri tutmuş və fərqlənmiş uşaqlar təşkilatçılar tərəfindən müvafiq dərəcəli diplomlar, xatirə hədiyyələri və pul mükafatları ilə təltif olunacaqlar.
Mükafat fondu:
I yer – 70 manat
II yer – 50 manat
III yer – 30 manat
Əlavə Fərqlənmiş 8 yer (IV-X) – 10 manat
